Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 210 Hüküm no: 154 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Emine’nin varisleri arasındaki menzil satışı davasında anlaşma sağlanması Mahmiye-i İstanbul’da Altıpoğaça mahâllesinde sâkine iken bundan akdem vefât eden Emine bt. Muslı nâm hatunun verâseti sadrî kebîr oğlu el-Hâc Ahmed ve sadriye kebîre kızı Ümmügülsüm ibney ( ) nâm kimesneye münhasıra olduğu şer‘an sâbit oldukdan sonra zâtı ta‘rîf-i şer‘î ile mu‘arrefe olan mezbûre Ümmügülsüm mahmiye-i mezbûrede meclis-i şer‘de li-ebeveyn er karındaşı işbu bâ‘isü’l-kitâb mezbûr el-Hâc Ahmed mahzarında ikrâr ve takrîr-i kelâm edip vâlidem müteveffât-ı mezbûrenin muhallefâtından bi’l-irsi’ş-şer‘î benim ile karındaşım mezbûr el-Hâc Ahmed’e isâbet ve intikāl eden mahâlle-i mezbûrede Topkapısı dâhilinde Bâyezid Ağa mahâllesinde vâki‘ lede’l-ahâlî ve’l-cîrân ma‘lûmü’l-hudûd menzilden bana isâbet eden hisse-i şer‘iyyemi cümle tevâbi‘ ve levâhıkı ile bundan akdem karındaşım mezbûr el-Hâc Ahmed’e otuz beş guruş semen-i makbûza bey‘ ve teslîm ol dahi iştirâ ve tesellüm eylediğinden sonra menzil-i mezbûrun mecmû‘u ırsen ve şirâen karındaşım mezbûr el-Hâc Ahmed’in mülkü olmuş iken menzil-i mezbûrdan hisse-i ırsiye-i şer‘iyyemi semen-i mislinden noksâna bey‘ etmiş idim deyü karındaşım mezbûr el-Hâc Ahmed’den gabn da‘vâsı sadedinde olduğumda beynimizde nizâ‘-ı küllî vâkı‘a olmağla muslihûn tavassut edip da‘vâ-i mezbûremden beni karındaşım mezbûr el-Hâc Ahmed ile yirmi guruş üzerine sulh eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûr yirmi guruşu yedinden tamamen ahz u kabz eyledim. Vâlidem müteveffâ-yı mezbûrenin muhallefâtından menzil-i mezbûr ve sâir ma‘lûme ve mechûle mülhakātına müte‘allıka âmme-i da‘vâ ve mutâlebâtdan karındaşım mezbûr el-Hâc Ahmed’in zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 2 min-şehri Rebî‘i’l-evvel sene 1116 Şuhûdü’l-hâl: el-Hâc Hasan Efendi el-imâm, Sinan Çelebi b. Ali, Berber Osman b. Ömer, Süleyman b. Osman, Hüseyin Beşe b. Şaban, Molla İbrahim b. Hüseyin.