Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 211 Hüküm no: 155 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Durmuş v. Manik’in ticari ortağı olan Hasan Çelebi ile hesaplarını kapatmaları Vilâyet-i Anadolu’da Kirmasti kasabası ahâlîsinden Durmuş v. Manik nâm Ermeni mahmiye-i İstanbul’da meclis-i şer‘de şerîki işbu râfi‘ü’l-vesîka Hasan Çelebi b. Süleyman nâm kimesne mahzarında ikrâr ve takrîr-i kelâm edip mezbûr Hasan Çelebi ile bundan akdem ben şerîk olup altı yüz yirmi üç guruş mezbûr Hasan Çelebi’nin re’[s-i] malı olup benim dahi yüz kırk altı guruş re’s-i malım olmağla meblağ-ı mezbûru birbirine halt edip kasaba-i mezbûre ve etrâfında un iştirâ ve âhara bey‘ ve kabz-ı semen eylediğimizden sonra bi’l-cümle asl-ı mâlımızı ve hâsıl olan fâideyi beynimizde mezbûr Hasan Çelebi ile ba‘de’l-hesâb asl-ı mâlım olan yüz kırk altı guruşdan mâ‘adâ hâsıl olan on bin akçe fâideden benim re’s-i malıma göre on altı guruş bana isâbet etmekle el-hâletü hâzihi kasaba-i mezbûrede sâkin Gedikoğlu Sahak nâm zimmîden iştirâ olunan yüz altmış keyl buğday semeni olan kırk dört guruş mukaddemâ olan hesâbıma mahsûb olmağla asl-ı mâlım olan meblağ-ı mezbûr yüz kırk dört guruşu ve fâideden hâsıl olan meblağ-ı mezbûr on altı guruş ki cem‘an yüz altmış iki guruşu mezbûr Hasan Çelebi bana def‘ ü teslîm ben dahi yedinden ba‘de’l-ahz ve’l-kabz şirket-i mezbûra müte‘allıka âmme-i deâ‘vîden mezbûr Hasan Çelebi’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 3 min-şehri Rebî‘ülevvel sene 1116 Şuhûdü’l-hâl: Mustafa Çelebi b. Süleyman, Yahya Beşe b. Abdullah, el-Hâc Yusuf b. Osman, İsmail b. Abdullah, el-Hâc Yusuf b. Hüseyin.