Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 211 Hüküm no: 156 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahraman Hatun’un Edirne’deki menzilini müştemilatıyla birlikte Divitdar Mehmed Ağa’ya satması Mahrûse-i Edirne’de Kâtib-i Cev mahâllesi sâkinelerinden olup müsâferet vechi üzere mahmiye-i İstanbul’da Zeyrek kurbünde sâkine zâtını ma‘rifet-i şer‘iyye ile ârifân Mehmed Çelebi b. Ali ve Hasan Çelebi [b] Hüseyin nâm kimesneler ta‘rîfleriyle mu‘arrefe olan Kahraman bt. Abdullah nâm Hatun mahmiye-i mezbûrede meclis-i şer‘de hâlâ Nişâncı olan vezîr-i mükerrem sa‘âdetlü Hüseyin Paşa hazretlerinin dividdârı olan işbu râfi‘ü’l-vesîka Mehmed Ağa b. Şaban nâm kimesne mahzarında ikrâr-ı tam ve takrîr-i kelâm edip bey‘-i âti’z-zikrin sudûruna değin yedimde mülküm olup mahrûse-i mezbûrede zikr olunan Kâtib-i Cev mahâllesinde vâki‘ bir tarafdan mahâlle-i mezbûre câmi‘-i şerîfi ve etrâf-ı selâsesi tarîk-i âm ile mahdûd üç bâb odayı ve eşcâr-ı müsmire ve gayr-ı müsmireli bahçeli ve tatlı bir bi’r-i mâyı ve bir sofa ve bir kenîf ve havluyu müştemil menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Mehmed Ağa’ya yüz elli guruşa bey‘ ve temlîk, ol dahi ber-vech-i muharrer iştirâ ve temellük ve kabûl etdiğinden sonra semeni olan meblağ-ı mezbûr yüz elli guruşu mutâlebesinden mezbûr Mehmed Ağa’nın zimmetini ibrâ ve iskāt eyledim, ba‘de’l-yevm menzil-i mahdûd-ı mezbûr merkūm Mehmed Ağa’nın mülk-i müşterâsıdır, mahâllinde ahz u kabz ve tasarrufa merkūm Mehmed Ağa’yı taslît eyledim keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâis min-Rebî‘ülevvel sene 1116. Şuhûdü’l-hâl: İsmail Efendi el-kādı, Selim Ağa b. Abdullah, Kethüdâ Ali Ağa b. Arslan, Mehmed Efendi b. Abdullah, Mehmed Ağa b. Ali, Sâtır Mehmed Ağa b. Ahmed, Kahvecibaşı Hasan b. Abdullah, Hasan Efendi b. ( ), Mustafa Efendi el-kādı.