Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 212 Hüküm no: 157 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun ve kardeşi Rabia’nın menzillerini müştemilatıyla birlikte Yusuf Çelebi’ye satmaları Mahrûse-i İstanbul’da Mimarsinan mahâllesinde sâkine olup zâtı Süleyman b. Abdullah ve Yusuf b. Mustafa nâm kimesneler ta‘rîfleriyle mu‘arrefe olan Havva bt. Mehmed Sipâhî nâm hatun asâleten ve li-ebeveyn kız karındaşı Rabia nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân mezbûrân Süleyman ve Yusuf şehâdetleri ile sâbit Hüseyin Ağa b. Abdurrahman nâm kimesne <> vekâleten mahmiye-i mezbûrede meclis-i şer‘de işbu râfi‘ü’l-vesîka Yusuf Çelebi b. Abdullah nâm kimesne mahzarında her biri bi’l-asâle ikrâr ve takrîr-i kelâm edip mahâlle-i mezbûrede vâki‘ binâsı mülk arsasının İsmail Ağa Vakfı’na ve bir mikdâr Molla Ahi Vakfı’na senede mukāta‘a-i ma‘lûmesi olup İkinci Oda ta‘bîr olunur bir tarafdan mezbûretân Havva ve Rabia menzilleri ve bir tarafdan Bayram Efendi menzili ve bir tarafdan Hüdayizâde tasarrufunda olan Molla Ahi Vakfı bahçe ve bir tarafdan tarîk-i âm ile mahdûd fevkānî bir bâb odayı ve bir sofayı ve bir mikdâr havluyu müştemil ebniyesi yedimizde mülk ve hakkımız olan menzili tarafeynden îcâb ve kabûlü hâvî bey‘-i kat‘î ile mezbûr Yusuf Çelebi’ye yüz yirmi guruşa bey‘ ve teslîm ve arsasını bâ-ma‘rifet-i mütevellî meccânen ferâğ ve tefvîz ol dahi iştirâ ve tesellüm ve tefevvüz ve kabûl eyledikden sonra semeni olan meblağ-ı mezbûru bi’l-asâle ve bi’l-vekâle yedinden tamâmen ahz u kabz eyledik, ba‘de’l-yevm menzil-i mahdûd-ı mezbûrun ebniyesi merkūm Yusuf Çelebi’nin mülk-i müşterâsı olup ve arsası dahi bâ-ma‘rifet-i mütevellî hakk-ı müfevvezi olmuşdur, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 3 min-Rebî‘ülevvel sene 1116. Şuhûdü’l-hâl: Mehmed Efendi b. Ahmed, Gümüşîzâde Mehmed Mukim Efendi, Hüseyin Efendi b. Hasan, Mehmed b. Abdullah, Mustafa Beşe b. ( ). el-Hâc Yusuf b. Osman.