Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 213 Hüküm no: 158 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed’in menzil ve müştemilatını Abdullah Çelebi’ye satması Mahmiye-i İstanbul’da Alipaşa-i atik mahâllesi sâkinelerinden Âişe bt. Ahmed nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân Mustafa b. Abdullah ve Salih b. Abdullah nâm kimesneler şehâdetleri ile şer‘an sâbit olan Hasan Ağa b. Hüseyin nâm kimesne mahmiye-i mezbûrede meclis-i şer‘de işbu râfi‘ü’l-vesîka A‘mâ Abdullah Çelebi b. İbrahim nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedinde mülkü ve hakkı olup mahâlle-i mezbûrede vâki‘ bir tarafdan Nalçacı Mehmed Çelebi veresesi yedlerinde olan menzil ve bir tarafdan Saraylı Fâtıma Hatun menzili ve bir tarafdan İsmail Efendi ve bir tarafdan tarîk-i âm ile mahdûd dâhiliyesinde fevkānî iki bâb odayı ve bir kebîr sofayı ve kilârı ve tahtânî bir oda ve bir kenîf ve mahtabı müştemil menzil müvekkile-i mezbûre Âişe’nin mülkü olmağla bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile müvekkile-i mezbûre Âişe dört yüz guruşa mezbûr A‘mâ Abdullah Çelebi’ye bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûru tamâmen yedinden ahz u kabz eyledi, ba‘de’l-yevm menzil-i mahdûd-ı mezbûr A‘mâ Abdullah Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-şehri Rebî‘ülevvel sene 1116 Şuhûdü’l-hâl: el-Hâc Ahmed b. el-Hâc Ali, Ahmed Beşe b. Hüseyin, el-Hâc Ali b. Abdullah, Abdullah b. Mustafa, Mustafa b. Mehmed, İplikçi Ali Çelebi, Mustafa b. Ahmed,