Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 214 Hüküm no: 159 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mehmed’in iki adet menzil ve müştemilatını Bayram Efendi’ye satması Mahmiye-i İstanbul’da Mimarsinan mahâllesinde sâkine olup zâtı Süleyman b. Abdullah ve Yusuf b. Mustafa nâm kimesneler ta‘rîfleriyle mu‘arrefe olan Havva bt. Mehmed nâm hatun tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân mezbûrân Süleyman ve Yusuf şehâdetleriyle şer‘an sâbit olan Hüseyin Ağa b. Abdurrahman nâm kimesne vekâleten mahmiye-i mezbûrede meclis-i şer‘de işbu râfi‘ü’l-vesîka Bayram Efendi b. Mehmed nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip mahâlle-i mezbûrede vâki‘ binâsı mülk arsalarının İsmail Ağa ve bir mikdâr Molla Ahi Vakfı’na senede mukāta‘a-i ma‘lûmesi olup üçüncü ve dördüncü ta‘bîr olunur bir tarafdan mezbûretân Havva ve Rabia menzilleri ve bir tarafdan Yusuf Çelebi menzili ve bir tarafdan Fedayizâde tasarrufunda olan Molla Ahi Vakfı bahçe ve bir tarafdan tarîk-i âm ile mahdûd fevkānî bir bâb odayı ve tahtânî bir bâb odayı ve bir sofayı ve birer mikdâr havluyu müştemil ebniyeleri yedimizde mülk ve hakkımız olan iki bâb menzili tarafeynden îcâb ve kabûlü hâvî bey‘-i kat‘î ile mezbûr Bayram Efendi’ye iki yüz kırk guruşa bey‘ ve teslîm ve arsalarını dahi bâ-ma‘rifet-i mütevellî meccânen ferâğ ve tefvîz, ol dahi iştirâ ve tesellüm ve tefevvüz ve kabûl eyledikden sonra semeni olan meblağ-ı mezbûru bi’l-asâle ve bi’l-vekâle yedinden tamâmen ahz u kabz eyledik, ba‘de’l-yevm menzileyn-i mahdûdeyn-i mezbûreynin ebniyesi merkūm Bayram Efendi’nin mülk-i müşterâsı olup ve arsaları dahi hakk-ı müfevvezi olmuşdur dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 3 min-Rebî‘ülevvel sene 1116. Şuhûdü’l-hâl: Mehmed Efendi b. Ahmed, Gümüşîzâde Mehmed Kasım Efendi. Hüseyin Efendi b. Hasan, Mehmed b. Abdullah, Odabaşı Mustafa Beşe, el-Hâc Yusuf b. Osman.