Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 215 Hüküm no: 161 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Nano’nun Mehmed Şeyhi Efendi’de olan alacağının tahsili Kürkçü tâifesinden işbu bâ‘isü’s-sifr Nano v. Manol nâm zimmî mahmiye-i İstanbul’da meclis-i şer‘-i hatîr-i lâzımü’t-tevkīrde Mehmed Şeyhî Efendi b. Hibetullah Efendi mahzarında üzerine da‘vâ ve takrîr-i kelâm edip işbu yedimde olan deyn temessükü nâtık olduğu üzere bundan akdem mezbûr Mehmed Şeyhi Efendi’ye malımdan iki yüz altmış guruş ikrâz ve teslîm ol dahi iktirâz ve kabz ve tesellüm ve masârıfına sarfla istihlâk edip bana zimmetinde vâcibü’l-[edâ] deyni olduğunu mümzâ ve mahtûm yedime bir kıt‘a deyn temessükü verdiğinden sonra meblağ-ı mezbûrdan emrim ile vilâyet-i Rumeli’nde Kesriye kazâsında sâkine vâlidem Yozo nâm Nasrâniyeye seksen iki [guruş] verip mâ‘adâsı olan yüz yetmiş sekiz guruş mezbûr Mehmed Şeyhî Efendi zimmetinde bâkī kalmağla hâlâ taleb eylediğimde bana edâdan imtinâ‘ eder, suâl olunsun dedikde, gıbbe’s-suâl mezbûr Mehmed Şeyhî Efendi cevâbında müdde‘î-i mezbûrun yedinde olan deyn temessükü kendinin memhûr ve mümzâ deyn temessükü olduğunu ikrâr, lâkin müdde‘î-i mezbûrdan ancak yüz iki guruş iktirâz ve kabz edip ziyâdesi olan yüz elli sekiz guruşu ahz u kabz etmeksizin iki yüz altmış guruş aldım deyü ikrâr edip yedine mümzâ ve mahtûm deyn temessükü verdim. Lâkin ziyâde kabz eyledim deyü eylediğim ikrârımda kâzib olmağla müdde‘î-i mezbûrun emriyle vâlidesi mezbûre Yozo’ya medfû‘um olan seksen iki guruşdan bâkī müdde‘î-imezbûra ancak yirmi guruş deynim vardır deyü ikrâr, ma‘a’l-kâzib da‘vâsı edicek husûs-ı mezbûrda merkūm Mehmed Şeyhî Efendi bu vech üzere ikrârında kâzib olmayıp kendi dahi da‘vâ-i mezbûresinde mübtıl olmadığına müdde‘î-i mezbûra yemîn teklîf olundukda ol dahi alâ-vefkı’l-mesûl yemîn billâhillezî enzele’l-İncîle alâ-İsâ -aleyhi’s-selâm- etmeğin mûcebince meblağ-ı bâkī-i mezbûr yüz yetmiş sekiz guruşu müdde‘î-i mezbûra edâ ve teslîme merkūm Mehmed Şeyhî Efendi’ye tenbîh birle mâ-vaka‘a bi’t-taleb ketb olundu. Fî 3 min-şehri Rebî‘ülevvel sene 1116. Şuhûdü’l-hâl: İsmail Efendi kâtib, Ömer Efendi kâtib, Veli Efendi kâtib, Mehmed Efendi b. ( ).