Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 216 Hüküm no: 162 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Yusuf’un eşi Şaban b. Osman’dan muhalaa usulüyle boşanması Mahmiye-i İstanbul’da Eski İmâret mahâllesinde sâkine olup zâtı el-Hâc Mehmed b. Ahmed ve Nuh Çelebi b. Ahmed nâm kimesneler ta‘rîfleriyle mu‘arrefe olan Âişe bt. Yusuf nâm Hatun mahmiye-i mezbûre’de meclis-i şer‘-i hatîr-i lâzımü’t-tevkīrde işbu bâ‘isü’l-vesîka zevc-i muhâlı‘ı es-Seyyid Şaban b. Osman nâm kimesne mahzarında ikrâr ve takrîr-i kelâm edip zevcim mezbûr Seyyid Şaban ile beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan otuz beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Seyyid Şaban ile muhâla‘a-i sahîha-i şer‘iyye ile muhâla‘a edip ol dahi minvâl-i muharrer üzere hul‘-ı mezbûru kabûl etdikden sonra hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-şehri Rebî‘ülevvel sene 1116 Şuhûdü’l-hâl: Mustafa Efendi el-imâm, Yusuf Çelebi b. Abdullah, Hacı Halil b. Mehmed, Musa Bey b. Mustafa, Himmet Beşe b. Şaban, Mustafa Çelebi b. Mustafa, el-Hâc Yusuf b. Osman.