Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 216 Hüküm no: 163 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marat v. Mağdavak’ın, Haropsima bt. Aznavur’a olan borcunun taksite bağlanması Mahmiye-i Üsküdar’da vâki‘ merhûm Mahmud Efendi fırınında ekmekçi olan Marat v. Mağdavak nâm zimmî mahmiye-i İstanbul’da meclis-i şer‘-i hatîr-i lâzımü’t-tevkīrde Galata muzâfâtından kasaba-i Kasımpaşa’da Kameri Hatun mahâllesinde sâkine Haropsima bt. Aznavur nâm Nasrâniye tarafından husûs-ı âti’l-beyana vekîl olduğu yedinde olan mazmûnu müsbet vekâlet hücceti ile sâbite olan Hüseyin Çelebi b. Mehmed nâm kimesne mahzarında ikrâr ve takrîr-i kelâm edip müvekkile-i mezbûre bundan akdem cihet-i deyn-i şer‘îden senin zimmetinde kırk bin akçe hakkım vardır deyü benden ve ben dahi inkâr etmekle ba‘de’n-nizâ‘ da‘vâ-i mezkûresinden müvekile-i mezbûre benim ile yetmiş guruş ile bir top zincir baft? üzerine sulh olup her birimiz sulh-ı mezbûru kabûl eylediğimizden sonra bedel-i sulh olan meblağ-ı mezbûr yetmiş guruşun on guruşu ile zikr olunan zincir baftı? vekîl-i mezbûra def‘ ü teslîm, ol dahi ahz u kabz edip bedel-i sulh-ı mezbûrdan zimmetimde bâkī kalan altmış guruşu müvekkile-i mezbûreye hâlâ def‘aten edâya iktidârım olmayıp taksîte tâlib olduğum ecilden ol dahi târîh-i kitâbdan her otuz gün tamâmında kendüye ikişer guruş verip meblağ-ı bâkī-i mezbûr altmış guruşu dokuz yüz gün tamâmına değin müvekkile-i mezbûreye tamâmen edâ ve teslîm etmek üzere beni tecîl ve taksît edip ben dahi taksît-i mezbûru kabûl etmekle bu vech üzere meblağ-ı bâkī-i mezbûr altmış guruş müvekkile-i mezbûreye zimmetimde müeccel ve mukassat deynimdir dedikde, gıbbe’t-tasdîki’ş-şer‘î mukırr-ı mezbûr Marat zimmînin sulbî kebîr oğulları Okin ve Matyos nâm zimmîlerden her biri babaları mezbûr Marat’ın müvekkile-i mezbûreye ber-vech-i muharrer müeccel ve mukassat zimmetinde deyni olan meblağ-ı mezbûr altmış guruşa tarafeynden emr u kabûlü hâviye kefâlet-i sahîha ile kefil olmağın mâ-vaka‘a bi’t-taleb ketb olundu. Fî 3 min-şehri Rebî‘ülevvel sene 1116. Şuhûdü’l-hâl: Mehmed Çavuş mübâşir, Ali Beşe b. ( ), Ali Bey b. ( ), el-Hâc Yusuf b. Osman, el-Hâc Ali b. Veli. Serkiz v. David, Harkaz v. Avanis, Parsam v. Melkon, Mardıros v. ( ), Vartan v. Mankasar.