Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 217 Hüküm no: 164 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe’nin Ustrova’daki çiftlik ve arazisini Ali Beşe’ye satması Fi’l-asl vilâyet-i Rumeli’de Ustrova kazâsına tâbi‘ Hododicde nâm karye ahâlîsinden olup hâlâ mahmiye-i İstanbul’da Balat kapısı kurbünda sâkin Hasan Beşe b. Hüseyin nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde Ali Beşe b. Hasan nâm kimesne <> mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup karye-i mezbûrede vâki‘ bir tarafdan Emir? b. Hasan menzili ve bir tarafdan Halil nâm kimesne menzili ve iki tarafdan tarîk-i âm ile mahdûd tahtânî bir bâb oda ve bir kilâr ve bir samanlık ve bir harman yeri ve bir mikdâr Bostan yerini müştemil çiftlik ta‘bîr olunur mülk menzilimi bi-cümleti’t-tevâbi‘ ve’l-levâhık tarafeynden bi’l-îcâb ve’l-kabûl bey‘-i kat‘î ile mezbûr Ali Beşe’ye on guruşa bey‘ ve temlîk ve yine taht-ı tasarrufumda olup karye-i mezbûre hudûdu dâhilinde çiftlik-i mezkûra teba‘iyet ile ber-mûceb-i temessükât zirâ‘at ve hırâset eylediğim ma‘lûmü’l-kıt‘a tarlalarımı dahi bâ-ma‘rifet-i sâhib-i arz mezbûr Ali Beşe’ye beş guruş bedel mukābelesinde ferâğ ve tefvîz, ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen-i mezbûr on guruş ile bedel-i merkūm beş guruş ki cem‘an on beş guruşu mezbûr Ali Beşe yedinden tamâmen ahz u kabz eyledim. Ba‘de’l-yevm mârrü’z-zikr çiftlik-i mezbûr Ali Beşe’nin mülk-i müşterâsı ve tarlalar dahi hakk-ı müfevvezi olmuşdur, her birini mahâllinde zabt u tasarrufa tarafımdan mezbûr Ali Beşe’yi taslît eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ömer Beşe b. Mustafa, Ahmed Beşe mu‘temed b. ( ), Sefer Beşe b. Ömer, Hüseyin Beşe b. Bayram, Hasan Beşe b. Mehmed, Kasım Beşe b. Mehmed, Bekdaş Beşe b. Süleyman.