Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 218 Hüküm no: 165 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esterina ve Pizo’nun varisleri Duka’dan intikal eden Rus asıllı köleleri Yani’yi azat etmeleri Fi’l-asl vilâyet-i Rumeli’nde Ergirikesri kazâsına tâbi‘ Sırakeniste? nâm karye ahâlîsinden olup Malkara’ya tâbi‘ Elmalı nâm karyede sâkin iken bundan [akdem] hâlik olan Duka v. Anaştaş nâm zimmînin verâseti zevce-i metrûkesi Esterina bt. Noşe nâm Nasrâniye ile li-ebeveyn ammi oğlu Pizo v. İstati nâm zimmîye münhasıra olduğu şer‘an zâhir ve mütehakkık oldukdan sonra mezbûre Esterina ile merkūm mahmiye-i İstanbul’da meclis-i şer‘de hâlik-i mezbûrun terekesinden olup ba‘de-helâkihi kendülere intikāl etmekle yedlerinde mevrûsen mülkleri olan işbu orta boylu mâvi gözlü kıvrık burunlu esmerü’l-levn Rusiyyü’l-asl kâfirü’l-mille râfi‘u hâze’r-rakīm Yani v. Petko nâm zimmî mahzarında her biri ikrâr ve takrîr-i kelâm edip mû[ri]simiz hâlik-i mezbûr Duka’ya rıkkını mu‘terif olup ba‘de-helâkihi bize bi’l-irsi’ş-şer‘î intikāl eden mevsûf-ı mezbûr Yani’yi lâ-li-ivazin ve lâ-li-garazin malımızdan âzâd ve mülkümüzden ihrâç ve sâir ahrâr-ı asliyyîn zümresine ilhâk ve idrâc eyledik ba‘de’l-yevm mevsûf Yani sâir ahrâr-ı asliyyîn gibi hür olup [47b] üzerinde velâ-i şer‘îden gayrı hakkımız kalmadı dediklerinde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: el-Hâc Osman b. Mehmed, Mehmed Ağa b. Ahmed, el-Hâc İbrahim b. ( ), el-Hâc Yusuf b. Osman.