Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 218 Hüküm no: 166 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa, Emine Hanım, Ahmed Ağa ve Abdullah Bey’in Litros karyesindeki çiftlik hisselerini Kiridos v. Yani’ye satmaları Tahakkuk-ı özr-i şer‘îye binâen husûs-ı âti’l-beyanın mahâllinde ketb ü tahrîri iltimâs olunmağın cânib-i şer‘-i mutahhardan irsâl olunan Mustafa Efendi b. Mehmed Efendi mahmiye-i İstanbul’da Mimarsinan mahâllesinde sâkin Ali Ağa b. Çelebi’nin menziline varıp zeyl-i kitâbda mastûrü’l-esâmi olan Müslimîn huzûrunda akd-i meclis-i şer‘-i mübîn eyledikde Havâss-ı refî‘a kazâsı muzâfâtından Çekmece-i suğrâ nâhiyesine tâbi‘ Litroz nâm karyede vâki‘ etrâf-ı erba‘ası tarîk-i âm ile mahdûd [ve] mümtâz bir bâb bakkāl dükkânı ve bir mahzen ve bir küçük han ve bir samanlık ve havluyu müştemil çiftlik ta‘bîr olunur menzilin sekiz sehmden dört sehmi el-Hâc Mustafa Ağa b. Mehmed’in şirâen mülkü ve bir sehmi Emine Hanım bt. el-merhûm Mustafa Paşa’nın ırsen mülkü olduğu şer‘an zâhir ve müte‘ayyin oldukdan sonra mezbûr el-Hâc Mustafa Ağa asâleten ve mezbûre Emine Hanım tarafından husûs-ı âti’l-beyâ[na] vekîl olduğu zât-ı mezbûreyi ma‘rifet-i şer‘iyye ile ârifân olan mezbûr el-Hâc Ahmed Ağa b. Mehmed ve Mehmed Ağa b. el-Hâc Mustafa nâm kimesneler şehâdetleriyle vekâleti sâbite olmağla vekâleten ve mezbûr el-Hâc Ahmed Ağa dahi asâleten ve mezbûr Abdullah Bey’in tesviye-i emrine kıbel-i şer‘den mansûb vasîsi olan mezbûr Ali Ağa dahi vesâyeten meclis-i şer‘-i ma‘kūdda karye-i mezbûre ahâlîsinden işbu bâ‘isü’s-sifr Kiridso v. Yani nâm zimmî muvâcehesinde her biri asâleten ve vekâleten ikrâr ve takrîr-i kelâm edip akd-i âtî sudûruna değin vech-i mezkûr üzere yedimizde mülk ve hakkımız olan çiftlik ta‘bîr olunur menzil-i mahdûd-ı mezbûru cümle tevâbi‘ ve levâhıkı ve kâffe-i hukūk ve merâfıkı ile biz âhara bey‘ murâd etmekle menzil-i mahdûd-ı mezbûr harâba müşrif ve sagīr-i mezbûr Abdullah Bey’in hisse-i mezkûresi taksîm olundukda kâbil-i intifâ‘ olmamağla sagīr-i mezbûrun dahi hisse-i mezkûresi ma‘an bey‘ olunup hâsıl olan semeni i‘mâl ve istirbâh olunmak sagīr-i mezbûr hakkında her vechile evlâ ve enfa‘ olmağın bi’l-izni’ş-şer‘î menzil-i mahdûd-ı mezbûr otuz günden mütecâviz müzâyede olunup rağabât-ı nâs bi’l-külliye munkatı‘a olundukdan sonra mesfûr Kiridso üzerinde iki yüz guruşa karâr ve ziyâde ile tâlib-i âhar zuhûr etmemekle ve meblağ-ı mezbûr yevm-i bey‘de menzil-i mahdûd-ı mezbûrun semen-i misli olduğunu sikāt-ı Müslimîn ihbâr etmeleriyle biz dahi menzil-i mahdûd-ı mezbûru tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile asâleten ve vekâleten ve vesâyeten mesfûr Kiridso’ya meblağ-ı mezbûr ikiyüz guruşa bey‘ ü temlîk, ol dahi ber-vech-i muharrer iştirâ ve temellük ve semeni olan meblağ-ı mezbûr iki yüz guruşu mesfûr Kiridso yedinden tamâmen ahz u kabz edip her birimiz yedimizde alâ-kadri’l-hısas taksîm eyledik. Ba‘de’l-yevm menzil-i mahdûd-ı mezbûr mesfûr Kiridso’nun mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olup mahâllinde kabz ve tasarrufa her birimiz mesfûr zimmîyi taslît eyledik dediklerinde gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde tahrîr ma‘an ba‘s olunan Çukadâr el-Hâc Ali ve Ahmed b. Abdullah ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 4 min-Rebî‘ülevvel sene 1116. Şuhûdü’l-hâl: Ali Ağa b. Mehmed, Kâtib Ahmed Efendi b. ( ), Çorbacızâde Mehmed Ağa, Ebubekir Ağa b. ( ), Halil Odabaşı b. ( ).