Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 219 Hüküm no: 167 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdasar, Melkon ve Kazer v. Nazar kardeşlerin Meliki bt. Semaven aleyhindeki miras davasında anlaşma sağlanması Mahmiye-i İstanbul’da Sulumanastır semtinde zeytin mahâllesinde sâkin iken bundan akdem hâ[lik] olan Serkiz v. Agob nâm Ermeninin verâseti vâlidesi Meliki bt. Semaven nâm Nasrâniyeye ve li-ümmin kız karındaşı Meryem nâm sagīreye ve li-ebeveyn ammileri Bağdasar ve Melkon ve Kazer evlâd-ı Nazar’a münhasıra olduğu şer‘an zâhir oldukdan sonra mezbûr Bağdasar kendi tarafından asâleten ve karındaşları mezbûrân Melkon ve Kazer taraflarından hâlik-i mezbûrun <> metrûkâtından kendülere isâbet eden hisselerini ahz u kabza ve kendülere îsâle ve lede’l-iktizâ sulh ve ibrâya ve bunlar mütevekkıf olduğu umûrun küllîsine vekîl olduğu yedinde olan mazmûnu müsbet hüccet-i şer‘iyye ile sâbit olmağla vekâleten mahmiye-i mezbûrede meclis-i şer‘de hâlik-i mezbûrun metrûkâtına bi’l-verâse vâzı‘ü’l-yed olan vâlidesi mezbûre Melki’nin zevci ve tarafından husûs-ı âti’l-beyana vekîl-i müsecceli olan Bağdasar v. Olos nâm zimmî muvâcehesinde asâleten ve vekâleten ikrâr ve takrîr-i kelâm edip mûrisimiz hâlik-i mezbûrun muhallefâtından defter-i kassâm nâtık olduğu üzere benim ile karındaşlarım müvekkilân-ı mezbûrâna isâbet eden bin üç yüz guruşdan müvekkile-i mezbûre bundan akdem bana nakid yedi yüz elli guruş ve beş yüz elli guruşuna mahsûben elmaslı altından masnû‘ bir zümrüd yüzük ve siyâh minalı bir sarı yakut yüzük ve incili bir çift kırmızı yakut küpe verip ben dahi bu vech üzere hâlik-i mezbûrun metrûkâtından benim ile karındaşlarım müvekkilân-ı mezbûrâna isâbet eden cem‘an bin üç yüz guruşu müvekkile-i mezbûre Meliki yedinden ahz u kabz eylediğimden sonra [48a] zikr olunan yüzükler ve küpeleri ziyâde bahaya takvîm olunmağla ancak değeri iki yüz guruşdur deyip ziyâdesini taleb eylediğimden mâ‘adâ müvekkile-i mezbûre hâlik-i mezbûrun metrûkâtından defter-i kassâmdan hâriç yirmi erkânî ve yirmi bir fağfûrî kâse ve fincân ve beş gellüdanı ve def‘a yirmi beş fincân ve iki sürahi ve dokuz küçük fincân def‘a on bir fağfûrî kâse def‘a kebîr on üç fincân ve def‘a sagīr altı erkânî ve kırk dört kebîr çini kâse ve def‘a yirmi iki fağfûrî fincân ve sekiz külçe Ferhad hânî destâr ve on üç cividî kırmızı külçe ve yirmi aded Halebî darâyî ve altı aded harârî ve iki elvan âbâdî külçe ve on bir külçe köse ve kırk altı Halebî dâne ve altmış dokuz harârî ve yedi cera? destâr ve kırk şal ve kibriti yirmi iki şal ve kırk rızâî şal ve on taleşâhî ve elli yedi sandal yağı ve ıtır fitne? şişesi ve sekiz turuncu çit ve yirmi Mardin çiti ve yüz elli bogasi ve beş Bayram pûri? ve on beş fetevâyî ve on bir alaca ve o[n] dokuz keremsûd ve def‘a on şal boğça ve dokuz sâhibî ve sâir eşyâsını ahz u kabz, ketm ü ihfâ eylemiş idi deyü eşyâ-yı mezbûreden benim ile karındaşlarım müvekkilân-ı mezbûrâna isâbet eden hisse-i ırsiyemi müvekkile-i mezbûre Meleki’den da‘vâ ve taleb eylediğimde ol dahi husûs-ı mezbûru bi’l-külliye inkâr edip isbâtdan âciz olduğumdan mâ‘adâ yemîn etmesi dahi mukarrer olmağla bu vech üzere beynimizde münâza‘ât-ı kesîre vâkı‘a olmuş idi. El-hâletü hazihî da‘vâ-i mezbûremden beni asâleten ve vekâleten müvekkile-i mezbûre Melekî an-inkâr altmış üç guruş üzerine sulh etdikde ben dahi sulh-ı mezbûru kabûl ve bedel-i sulh olan meblağ-ı mezbûr altmış üç guruşu müvekkile-i mezbûre yedinden tamâmen ahz u kabz eylediğimden sonra zikr olunan yüzükler ve küpeler ve sâir ma‘lûme ve mechûle cemî‘ metrûkâtından benim ile karındaşlarım müvekkilân-ı mezbûrâna isâbet eden hisse-i şer‘iyyelerine müte‘allıka âmme-i de‘âvî ve kâffe-i mütâlebâtdan müvekkile-i mezbûre Meleki’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ahmed Çelebi b. İbrahim, Beziztânî el-Hâc Şahin, İbrahim Çavuş b. Rasul, Osman Çelebi b. Abdullah, Seyyid el-Hâc Hasan esirci, Attâr Siyavuş Halîfe, Süleyman Çelebi b. Murad Çelebi mumcu, Manuk v. Semaven, Arotin v. Nikoş, Nikelo? v. Asvador.