Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 221 Hüküm no: 168 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pizo v. İstati’nin Esterina aleyhindeki miras davasından vazgeçmesi Fi’l-asl vilâyet-i Rumeli’de Ergirikesri kazâsına tâbi‘ Sırakeniste? nâm karye ahâlîsinden olup Malkara’ya tâbi‘ Elmalı nâm karyede sâkin iken bundan akdem hâlik olan Duka v. Anastaş nâm zimmînin verâseti zevce-i metrûkesi Esterina bt. Noşe nâm Nasrâniye ile li-ebeveyn ammi oğlu Pizo v. Astati nâm zimmîye münhasıra olduğu şer‘an zâhir oldukdan sonra mezbûr Pizo mahmiye-i İstanbul’da meclis-i şer‘de râfi‘atü’l-vesîka mezbûre Esterina muvâcehesinde ikrâr ve takrîr-i kelâm edip mûrisim hâlik-i mezbûrun karye-i mezbûrede vâki‘ ma‘lûmü’l-hudûd bir bâb menzili ile kezâlik karye-i me[zbure] sınırı dâhilinde vâki‘ ma‘lûmü’l-hudûd tahmînen iki dönüm mülk bağını zevcesi mezbûre Esterina müstakilleten zabt etmekle ben dahi menzil-i mahdûd-ı mezkûr ile bağ-ı mahdûd-ı mezbûrdan hisse-i ırsiye-i ma‘lûmemi mezbûre Esterina’dan taleb ve da‘vâya tasaddî etmişdim. El-hâletü hâzihi hâlik-i mezbûrun terekesinden olup zikr olunan menzil ile bağdan bana isâbet eden hisse-i ırsiyeme müte‘allıka da‘vâdan mezbûre Esterina’nın zimmetini ibrâ ve iskāt edip ol dahi tereke-i hâlik-i mezbûre müte‘allıka da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-râbi min-şehri Rebî‘i’l-evvel sene 1116 Şuhûdü’l-hâl: el-Hâc Osman b. Mehmed, Mehmed Ağa b. Veli, el-Hâc İbrahim b. ( ), el-Hâc Yusuf b. Osman.