Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 221 Hüküm no: 169 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Rahime Hatun ve Havva Hatun aleyhindeki miras davasının reddedilmesi Mahmiye-i İstanbul’da Kalenderhâne mahâllesinde sâkin iken bundan akdem fevt olan el-Hâc Mehmed b. Hasan nâm kimesnenin verâseti zevceteyn-i metrûketeyn Havva bt. Abdullah nâm hatun ile Rahime bt. Abdullah nâm hatuna ve zevi’l-erhâm cihetinden Âişe bt. Abdi nâm hatuna münhasıra olduğu şer‘an zâhir oldukdan sonra mezbûre Âişe mahmiye-i mezbûrede meclis-i şer‘de mezbûretân Havva ve Rahime mahzarlarında üzerlerine da‘vâ ve takrîr-i kelâm edip mûrisimiz müteveffâ-yı mezbûr el-Hâc Mehmed fevt oldukda bi’l-cümle muhallefâtı zevceleri mezbûretân Havva ve Rahime ahz u kabz etmekle hâlâ tereke-i müteveffâ-yı mezbûrdan bana isâbet ve intikāl eden hisse-i ırsiyemi mezbûretân Havva ve Rahime’den tereke-i müteveffâ-yı mezbûrdan taleb ederim suâl olunsun dedikde, gıbbe’s-suâl mezbûretân Havva ve Rahime cevâblarında müteveffâ-yı mezbûrun ismi mâl ıtlâk olunur kat‘â eşyâsı olmayıp terekesi olmamağla tereke-i müteveffâ-yı mezbûre vaz‘-ı yedlerini inkâr edicek [48b] mezbûre Âişe’den müdde‘âsına beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müteveffâ-yı mezbûr fevt oldukda ismi mâl ıtlâk olunur eşyâsı olmayıp kalîl u kesîr terekesine vaz‘-ı yed etmediklerine mezbûretân Havva ve Rahime’ye yemîn teklîf olundukda onlar dahi alâ-vefkı’l-mesûl yemîn billâhi’l-aliyyi’l-a‘lâ etmeğin mûcebiyle mezbûre Âişe bilâ-beyyine mezbûretân Havva ve Rahime’ye bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘ülevvel sene 1116 Şuhûdü’l-hâl: Ebubekir Efendi b. ( ), Çörekci? Mehmed b. ( ), Ebubekir Odabaşı b. ( ), Ekmekçi Yusuf Beşe b. ( ), Hasan Nalçacı b. ( ), Hasan Çelebi b. Abdullah, Ali Çavuş b. Abdullah.