Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 224 Hüküm no: 171 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin Mehmed b. Yasin’de buğday bedelinden olan alacağının tahsili Navluncu tâifesinden olup mahmiye-i İstanbul’da Üskübî mahâllesinde sâkin işbu bâ‘isü’l-vesîka Hüseyin Çelebi b. Yusuf nâm kimesne mahmiye-i mezbûrede meclis-i şer‘-i şerîf-i enverde Uncu tâifesinden el-Hâc Mehmed b. el-Hâc Yasin nâm kimesne mahzarında üzerine da‘vâ ve takrîr-i kelâm edip bundan akdem mezbûr el-Hâc Mehmed yedimden iştirâ ve kabz eylediği altı yüz keyl buğdayın beher kîlesi ellişer akçeden cem‘an zimmetinde otuz bin akçe hakkım olmağla hâlâ mezbûr el-Hâc Mehmed’den taleb eylediğimde bana edâdan imtinâ‘ eder, suâl olunsun dedikde gıbbe’s-suâl mezbûr el-Hâc Mehmed cevâbında fi’l-hakīka müdde‘î-i mezbûr Hüseyin Çelebi yedinden iştirâ ve kabz eylediği ol mikdâr buğday semeninden zimmetinde otuz bin akçe deyni olduğunu ikrâr ve lâkin zikr olunan buğday un olup hamur oldukda siyâh olmağla mu‘ayyeb olup hâlâ mevcûd olmağla geri red olunmak üzere murâfa‘a eylediğinde buğday ahvâline vukūf-ı tâmmı olup uncu tâifesinin müsin ve ihtiyârlarından bî-garaz kimesnelere sâlifü’z-zikr buğday irâet olunup mezbûr el-Hâc Mehmed’in müdde‘î-i mezbûr Hüseyin Çelebi’den iştirâ ve kabz eylediği buğday Tekfurdağı buğdayı ve uyûbdan sâlib ve hâlisdir deyü mezbûr el-Hâc Mehmed’in muvâcehesinde haber verdiklerini irsâl olunan Çukadâr el-Hâc Ali meclis-i şer‘e gelip ihbâr etmeğin mûcebiyle kabzını mu‘terif olduğu altı yüz keyl buğdayın semeni olan meblağ-ı mezbûr otuz bin akçeyi müdde‘î-i mezbûr Hüseyin Çelebi’ye edâ ve teslîme mezbûr el-Hâc Mehmed’e tenbîh birle mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Hüseyin Çelebi b. Hamza, el-Hâc Mustafa b. Ahmed el-mübâşir, el-Hâc Yusuf b. ( ), Mehmed Çelebi b. Ahmed.