Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 224 Hüküm no: 172 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Ali’nin Belkis Hatun aleyhindeki menzil davasında anlaşma sağlanması Mahmiye-i İstanbul’da Keçeci Pîrî mahâllesinde sâkin iken bundan akdem fevt olan Süleyman Beşe b. Abdullah nâm kimesnenin verâseti zevce-i metrûkesi Belkıs bt. Abdullah ve sulbî kebîr oğlu Ali Efendi’ye ve sulbiye kebîre kızı Âişe Hatun’a münhasıra olup ba‘dehû mezbûr Ali Efendi dahi fevt olup verâseti sulbî oğulları Mehmed ve Mahmud’a münhasıra olup ba‘dehû mezbûr Mehmed dahi fevt olup verâseti ancak mezbûr Mahmud’a münhasıra olup ve tashîh-i meselesi bi-hükmi’l-münâsaha yirmi dört sehmden i‘tibâr olunup sihâm-ı mezbûrenin üç sehmi mezbûre Belkıs’a ve yedi sehmi mezbûre Âişe’ye ve on dört sehmi mezbûr Mahmud’a isâbeti tahakkukundan sonra mezbûr Mahmud mahmiye-i mezbûrede meclis-i şer‘de zikri âtî menzile vâzı‘ü’l-yed olan Râfi‘atü’l-vesîka Fâtıma bt. el-Hâc Mustafa nâm Hatun tarafından husûs-ı âti’l-beyana vekîl-i şer‘îsi olan zevci İbrahim b. Abdullah mahzarında ikrâr ve takrîr-i kelâm edip müteveffâ-yı evvel-i mezbûrun terekesinden olup mahâlle-i mezbûrede vâki‘ bir tarafdan el-Hâc Hasan vakfı menzili ve bir tarafdan Saliha Hatun menzili ve bir tarafdan Fâtıma nâm Hatun menzili ve bir tarafdan tarîk-i âm ile mahdûd tahtânî bir bâb oda ve bir matbâh ve bir su kuyusu ve kenîfi ve havluyu müştemil mülk menzilden tashîh-i mezbûr üzere bana intikāl eden on dört sehim hissemi hâl-i suğrumda kıbel-i şer‘den mansûb vasîm olan mezbûre Âişe semen-i mislinden noksân-ı fâhiş ile zarûret-i deynim dahi yok iken kendi hissesini asâleten ve benim hissemi vesâyeten mezbûre Belkıs’a semen-i ma‘lûme ve makbûza bey‘ ve teslîm edip ol dahi müvekkile-i mezbûre Fâtıma’ya bi’l-cümle bey‘ ve teslîm etmekle ben dahi ber-vech-i muharrer menzil-i mahdûd-ı mezbûrdan tashîh-i mezbûr üzere bana isâbet eden on dört sehim hissemi vâzı‘atü’l-yed olan müvekkile-i mezbûre Fâtıma’dan taleb ve da‘vâ sadedinde olduğumda beynimize muslihûn tavassut edip da‘vâ-i mezkûremden beni müvekkile-i mezbûre ile yirmi guruş üzerine akd-i musâlaha eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûru yedinden tamâmen ahz u kabz eylediğimden sonra menzil-i mezbûrda olan on dört sehim hisseme müte‘allıka âmme-i da‘vâdan müvekkile-i mezbûre Fâtıma Hatun’un zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-sene sitte aşere ve mi’e ba‘de’l-elf. Şuhûdü’l-hâl: el-Hâc Mehmed Efendi b. Süleyman imam, el-Hâc Mustafa b. Ömer, İbrahim b. el-Hâc Mustafa, Mustafa Çelebi b. Süleyman, Abdi Çelebi b. Mustafa, Hüseyin b. Ahmed, Mustafa b. Osman, Yusuf Çelebi b. Abdullah, el-Hâc Yusuf b. Osman.