Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 225 Hüküm no: 173 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markoli ve kardeşi Zaharya’nın Nikola v. Yani’den taleb ettikleri eşya bedeli davasını ispat edemedikleri Fi’l-asl cezîre-i Kıbrıs ahâlîsinden olup mahmiye-i İstanbul’da sâkin iken târîh-i kitâbdan on altı sene mukaddem hâlik olan Velesni v. Pireli nâm zimmînin sulbiye kızı Anderyana nâm Nasrâniyenin sulbî oğulları olup hasran vârisleri olan Markoli ve Zaharya v. Papa Nikola nâm zimmîler mahmiye-i mezbûrede meclis-i şer‘-i enverde Nikola v. Yani nâm zimmî muvâcehesinde her biri üzerine da‘vâ ve takrîr-i kelâm edip hâlik-i mezbûr mûrisimiz Velesin hayâtında mezbûr Nikola’ya malından beş yüz guruş ile beynlerinde ma‘lûm iki sandık eşyâsını îdâ‘ ve teslîm ol dahi istîdâ‘ ve tesellüm eyledikden sonra kable’l-ahz mûrisimiz mezbûr Velesin hâlik olmağla hâlâ bizler mezbûr Nikola’ya zafer bulup meblağ-ı mezbûr ile eşyâ-yı ma‘lûmeyi bi’l-verâse taleb ederiz, suâl olunsun dediklerinde gıbbe’s-suâl ve akībe’l-inkâr mezbûrân Markoli ve Zaharya’dan müdde‘âlarına beyyine taleb olundukda her biri ityân-ı beyyine[den] kemâl mertebe acz izhâr edip bir tarîk ile isbâta kādir olmadıklarından mâ‘adâ ezmân dahi mürûr eyleyip ve mezbûr Nikola’ya yemîn dahi vermemeleriyle müdde‘ân-ı mezbûrân ber-vech-i muharrer bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kādı, İsmail Efendi el-kâtib, Veliyüddin Efendi el-kādı, el-Hâc Yusuf b. Osman. Aleksandra v. Esteryola, Palas v. Yori, Tanaş v. Yorgi, Yani v. Panayot, Nikola v. Yorgi, Nikite v. Yani.