Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 226 Hüküm no: 174 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin Nemçe asıllı kölesi Yasef’i mükatebe suretiyle azat etmesi Mahmiye-i İstanbul’da Kâtibmuslihiddin mahâllesi sükkânından el-Hâc Hasan Beşe b. Hüseyin nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde kendüye rıkk-ı sâbıkını mu‘terif olan işbu orta boylu mâvi gözlü açık kaşlı Nemçiyyü’l-asl kâfirü’l-mille Yasef nâm abd-i memlûkü muvâcehesinde ikrâr ve takrîr-i kelâm edip mevsûf-ı mezbûr Yasef benim abd-i memlûküm olup üç seneden beri bana hizmet etmekle mevsûf-ı mezbûr Yasef’i târîh-i kitâb senesi Muharremü’l-haramı gurresinden iki sene tamâmına değin dahi bana hizmet etmek üzere kitâbete kat‘ eyledim bu vech üzere mevsûf-ı mezbûr Yasef bana târîh-i mezbûrdan iki sene tamâmına değin hizmet edip müddet-i mezbûre tamâm oldukda malımdan âzâd olup sâir ahrâr-ı aslıyyîn gibi hür olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl. Hasan Beşe b. Halil, Ahmed Beşe b. Abdullah, Süleyman Beşe b. Hüseyin, Keçeci el-Hâc Ömer b. ( ), el-Hâc Yusuf b. Osman.