Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 226 Hüküm no: 175 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Hüseyin’in, hür olması nedeniyle mahkemece azat edilen kölesi Yusuf’a ödediği bedeli Tekfurdağlı Mustafa’dan geri alması Mahmiye-i İstanbul’da Unkapanı kurbünde Receb b. Hüseyin nâm kimesne mahmiye-i mezbûrede meclis-i şer‘de Tekfurdağlı Mustafa Beşe b. Mehmed nâm kimesne mahzarında üzerine da‘vâ ve takrîr-i kelâm edip bundan akdem mezbûr Mustafa Beşe yedinde abd-i memlûkü olmak üzere orta boylu şaşı gözlü esmerü’l-levn Yusuf nâm şâbb-ı emredi seksen iki guruş semen-i makbûza bana bey‘ ve teslîm, ben dahi ba‘de’l-iştirâ ve’t-teslîm mezbûr Yusuf yedimde iken da‘vâ-i hürriyet edip ben medîne-i Sofya’da Vildan mahâllesinde sâkin Hasan b. Abdullah nâm kimesnenin firâşından ve zevcesi Fâtıma bt. Abdullah nâm hatundan mütevellid hürrü’l-asl sulbî oğluyum deyü huzûr-ı hâkim-i muvakkı‘-ı sadr-ı kitâbda müdde‘âsını mahâlle-i mezbûre ahâlîsinden Derviş Abdi b. Abdünnebi ve Mehmed b. Osman nâm kimesneler şehâdetleri ile muvâcehemde isbât, hürriyetine hükm ve sebîli tahliye olunmağla hâlâ mezbûr Mustafa Beşe’ye semen deyü medfû‘um olan meblağ-ı mezbûr seksen iki guruşu bana red ve teslîm etmek üzere tenbîh olunmak matlûbumdur dedikde gıbbe’s-suâl mezbûr Mustafa Beşe cevâbında fi’l-hakīka bundan akdem yedinde abd-i memlûkü üzere Yusuf nâm şâbb-ı emredi seksen iki guruş semen-i makbûza müdde‘î-i mezbûr Receb’e bey‘ ve teslîm eylediğini ikrâr lâkin müdde‘î-i mezbûrun yedinde iken ber-vech-i muharrer hürriyetini isbât edip ol vechile sebîli tahliye olunan bi-aynihî mezbûr Yusuf olduğunu inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden ve Tekfurdağı ahâlîsinden Murad Beşe b. Mehmed ve Mehmed Beşe b. Ali nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ bundan akdem mezbûr Mustafa Beşe yedinde abd-i memlûkü olmak üzere mezbûr Yusuf’u seksen iki guruş semen-i makbûza müdde‘î-i mezbûr Receb’e bey‘ ve teslîm ol dahi ba‘de’l-iştirâ ve’t-tesellüm mezbûr Yusuf yedinde iken da‘vâ-i hürriyet edip ben medîne-i Sofya’da Vildan mahâllesinde sâkin Hasan b. Abdullah nâm kimesnenin firâşından hâsıl ve zevcesi Fâtıma bt. Abdullah nâm hatundan mütevellid hürrü’l-asl sulbî oğluyum deyü huzûr-ı hâkimde müdde‘î-i mezbûrdan da‘vâ ve müdde‘âsını mahâlle-i mezbûre Derviş Abdünnebi ve Mehmed b. Osman nâm kimesneler şehâdetleriyle muvâcehemde isbât edip hürriyetine hüküm ve sebîli tahliye olunan bi-aynihî mezbûr Yusuf’dur, biz bu husûsa bu vech üzere şâhidleriz, [50a] şehâdet dahi ederiz deyü her biri edâ-yı şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın mûcebiyle meblağ-ı mezbûr seksen iki guruşu müdde‘î-i mezbûra edâ ve teslîme merkūm Mustafa Beşe’ye ba‘de’t-tenbîh merkūm Receb i‘âde-i kelâm edip ber-vech-i muharrer redd ü teslîmine tenbîh olunan meblağ-ı mezbûr seksen iki guruşu merkūm Mustafa Beşe bana ber-mûceb-i hükm-i şer‘î teslîm ben dahi yedinden tamâmen ahz u kabz eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 6 min-Rebî‘i’l-evvel sene 1116. Şuhûdü’l-hâl: Mehmed Çelebi b. İbrahim, Hüseyin Beşe b. Mustafa, Hüseyin b. İsmail, el-Hâc Osman b. Mehmed,