Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 305 Hüküm no: 271 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın yangın esnasında tahrip olan ve Sofyanoz tarafından tamir edilen evinin keşfinin yapılması Mahmiye-i İstanbul’da Mimarsinan mahâllesi ahâlîsinden olup hâlâ Rumeli kādıaskeri olan fazîletlü Abdurrahimzâde Yahya Efendi hazretlerinin çukadârları olan işbu bâ‘isü’l-kitâb el-Hâc Ali b. Abdullah nâm kimesne mahmiye-i mezbûrede meclis-i şer‘de takrîr-i kelâm ve ta‘bîr ani’l-merâm edip işbu sene-i mübârekede mahâlle-i mezbûrede vâki‘ olan harîkde Molla Ahi Câmi‘-i şerîfine muttasıl olup sâkin olduğum menzili ihrâkdan tahlîs için i‘ânet eden kimesneler etrâfını yıkdıkda menzil-i mezbûrun sakfının kiremidi hurde olup ve camları dökülüp ve tahta perdeleri yıkılıp ve sâir mevâzi‘ini dahi tahrîb? etmeleriyle menzil-i mezbûr ta‘mîr ve termîme muhtâc oldukda tüccâr tâifesinden işbu hâzır bi’l-meclis Sofyanoz v. ( ) nâm zimmîye mezbûru ta‘mîr ve termîm eyle ba‘dehû masrûfunu vereyim deyü emir eylediğimden sonra mezbûr Sofyanoz dahi menzil-i mezbûrun imâret ve termîmine muhtâc olan mevâzi‘ini emrimle ta‘mîr ve termîm etmekle menzil-i mezbûre bu vech üzere mezbûr Sofyanoz’un malından masrûfu olan meblağın ne mikdâra tahammülü olduğu ma‘lûmum olmak için taraf-ı şer‘den üzerine varılıp keşf ü tahrîr olunması matlûbumdur dedikde savb-ı şer‘den irsâl olunan mevlânâ Hüseyin Efendi b. Himmet üstâd-ı binâlardan el-Hâc Mehmed Dede b. İshak ve İbrahim Halîfe b. Mustafa ve Mehmed Halîfe b. Ali ve sâir ebniye ve sukūf ahvâline ıttılâ‘ı olan kimesneler ile menzil-i mezbûra varıp keşf ü nazar ve ta‘mîr olunan mevâzi‘ini mezbûrûn Hacı Mehmed Dede ve İbrahim Halîfe ve Mehmed Halîfe mesâfe ve masrûfunu tahmîn-i sahîh ile tahmîn etdiklerinde menzil-i mezbûrun tûlen ve arzen bi-hesâb-ı terbî‘î iki yüz on zirâ‘ sakfı akdarmasının da zirâ‘ı on beşer akçeden üç bin yüz elli akçe ve iki çift mücedded duvar camının her çifti üçer yüz akçeden altı yüz akçe ve yedi pencere camının da biri yetmişer akçeden dört yüz doksan akçe ve câmi‘-i mezbûr tarafında vâki‘ [70b] dehlizin müceddeden kırk iki zirâ‘ tahta perdenin her zirâ‘ı yirmi beşer akçeden bin elli akçe ve bu mahâlde kezâlik yirmi yedi zirâ‘ müceddeden tahta perdenin her zirâ‘ı yirmişer akçeden <> altı yüz yetmiş beş akçe ve sekiz zirâ‘ dört mücedded kafesin her zirâ‘ı ellişer akçeden dört yüz akçe ve duvar üzerine katlama yirmi zirâ‘ tahta perdenin her zirâ‘ı yirmi beşer akçeden beş yüz akçe ve iki aded ağaç demir pencere ve kanadın her biri yüzer akçeden iki yüz akçe ve on iki zirâ‘ mahlût kaygan döşemesinin her zirâ‘ı kırkar akçeden dört yüz seksen akçe ve dehlizde vâki‘ on beş zirâ‘ ağaç parmaklığın her zirâ‘ı otuzar akçeden dört yüz elli akçe ve tara saçağında olan üç aded ve verge tabanının da biri otuzar akçeden doksan akçe ve altı desteğin her biri otuzar akçeden yüz seksen akçe ve sofa altında mevzû‘ altı direk altında mevzû‘ altı kürsü taşı ve harc-ı mancılık ile her biri yüzer akçeden altı yüz akçe ve mücedded kiremid ile yirmi zirâ‘ duvar sakfının akdarmasının her zirâ‘ı yirmi beşerden beşyüz akçe ve menzil-i mezbûrun dâhiliye ve hâriciye mecmû‘ odalarının sıvasına ve boyasına ve yağına ve tuzuna bin sekiz yüz akçe kim min-haysü’l-mecmû‘ üstâdiye ve ırgadiye ve kireç ve mismârına ve tahta ve direkleri ile ancak on bir bin yüz altmış beş akçe ile ta‘mîr ve termîm olunur, noksân ile mümkün değildir deyü bâlâda isimleri mezkûr olan mi‘mârlar zeyl-i kitâbda isimleri mastûr olup ebniye ve sukūf ahvâline vukūf-ı tâmmı olan bî-garaz Müslimîn ile icmâ vü ittifâk etdiklerinde mevlânâ-yı mezbûr mahâllinde tahrîr, ba‘dehû Müslimîn-i mezbûrîn ile meclis-i mezbûra gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: İmam Hüseyin Efendi b. ( ), Mehmed Çelebi b. Yusuf, Müezzin Ömer Halîfe, Ahmed Çelebi b. el-Hâc Sinan, Ali Ağa b. Halil, el-Hâc Hasan b. Mustafa, İslâm Çelebi muhzır, Hacı Mustafa muhzır, Yusuf Çelebi b. Abdullah.